Psa 46 | KYG | STEP | Uta fala kita ne'mauna kotimo Goti'mae. Lokiyatimo Goti'mae. Hanageke ya'mo afole ne'aisigeno'ae'mo lahamaesiyafe'mo lahaopale'mo alo huno mai'niye.

Psalms 46

Goti'a lagae'e'mo magokepi lokaeno mai'niya gemae

1 Uta fala kita ne'mauna kotimo Goti'mae. Lokiyatimo Goti'mae. Hanageke ya'mo afole ne'aisigeno'ae'mo lahamaesiyafe'mo lahaopale'mo alo huno mai'niye. 2 Ani kava huno mai'niya'mofe'mo imima alige avemo aino nakupaeno emineno solovala anipi'mo asagauno aisigeno solovala ani'mo aino holakau holakau hisigeno alopa agemo aige avemo'a kanage huge nehisigetae'mo koli osugune.

4 Goti'a Ala kava ne'mo aeno apakase'niya vekamo mai'niya aote taonifi'mo mai'naya vaya'mogimo mago ani'mo nelamisige'apae'mo apamogaga aigae. 5 Goti'a ani taonifi'mo mai'niyanageno ani taonimo afa'a hanegaiye. Goti'a kotilamisiyapi'mo eno taonifi'mo mai'nisaya vaya'mo hapa maegaiye. 6 Alu nofi vaya'e alu nofi vaya'e'mo apayamukiki hu'a kame hute'apae'mo yagai'a ne'apataya vaya'e vaya'api'e'mo alagi asagau'a ai'nae. Goti'a alopa gefati'mo ge nehigeno'ae'mo lokiya'apimo alagi hano hu'niye. 7 Ala kava ne'mo'a asole vaya'aite'mo yagaino ne'apateya vekamo'a lagae'e'mo magokepi lokaeno mai'niye. Yekopu Goti'amo'mo uta fala kita ne'mauna kotigana huno mai'niye.

8 Etapa Ala kava ne'mo ali'ya'amo ageyo. Mopafi'mo alino ayu no'mo kino apate'niye. 9 Agaemo muki ma mopafi'mo kame nehaya kava'mo alino hano huno ne'atale. Agaemo ati keve'apimo alino lo aeno ataleteno alini u'a kame nehaya talala'apimo alino atafi'mo nekae. 10 Goti'a huno'ae'mo, muki kava'amo ataletapa afa'a mai'netapae'mo, Gotigamo mai'nane, hutapa nageyo, huno nehiye. Nagaemo muki alu nofi vaya'aitegati'e alu nofi vaya'aitegati'e'mo ala nagi'nimo aliguve. Muki ma mopafi'mo mai'naya vaya'aitegati'mo ala nagi'nimo aliguve, huno nehiye. 11 Ala kava ne'mo'a asole vaya'aite'mo yagaino ne'apateya vekamo'a lagae'e'mo magokepi lokaeno mai'niye. Yekopu Goti'amo'mo afa'a uta fala kita ne'mauna kotigana huno mai'niye.